انا خلاص هموت ولا اية

انا عارفة ان ميهمش حد اني عيانة ولا لا بس دي المدونة بتاعتي وانا حرة فيها باة ولامؤاخذة ولما عملتها كان عشان سبب واحد اني وحيدة ومليش اصحاب وعايزة اتكلم واقول كل حاجة عايزة اشوف الي بحس بية بعنيا مكنتش فاكرة اني ممكن حد يشاركني فرحي وزعلي بس لما حد بيعلق عندي بحس بالتعليق مش بقراة بس وبفرح اوي لما حد يشاركني لو بكلمة واحدة وكنت ابتديت اكتب عشان الناس الي بتقرا كلامي

بس لا انا فعلا عيانة ومحدش حاسس بيا انا عارفة ان محدش ولا هيزعل ولا هيفرح لما يعرف بس دي حاجة مهمة واثرت فيا

من فترة حسيت ان في حاجة في رقبتي وارمة شوية وبحس اني مخنوقة وبتوجعني بس مش دايما ولما الوجع زاد قررت اكشف مع اني مبحبش الدكاترة ولا الدوا بخف لوحدي دايما ودايما حاسة ان صحتي كويسة الموضوع ميستاهلش

المهم اني روحت وانا بكشف لقيت الدكتور عمال يقلب في حواجبة ويطقطق ويقول اةةةةة استني كدة مممممم طب وريني كدة نؤنؤنؤ بصراحة قلقت لقيتة راح باصصلي اوي وقالي بصي يامدام دي حاجة من اتنين يالغدة ياورم ومش عارفين هوة ورم خبيث ولا حميد ودة طبعا بعد متحللي وبعدين نشوف هنعمل اية عملية ولا علاج المهم نطمن واطلعي برة عند الممرضة هتقوم باللازم حسيت ان الدنيا بتلف بيا مكنتش اتوقع ابدا كل دة واستجمعت قوايا ونطقت وقلتلة بس انا مش مدام

قالي سوري اسف بس حسيت انة عايز يقولي دة وقتة انتي كمان بس كان شكلي بقة شبة الواد الي فوق دة من الخوف وكان علي طرف لساني هقولة يعني فاضلي قد اية واموت يادكتور بس مسكت نفسي

وكانت نتيجية التحليل بعد اسبوع ومقلتش لحد علي الي قالة خالص بس مكنتش عارفة انا حاسة باية ياتري لو طلع ورم هيحصل اية هموت يعني ولا اية انا طول عمري زهقانة من حياتي بس اكيد مش عايزة اموت علي الاقل دلوقتي حاسة اني معنديش حاجة اقابل بيها ربنا ومعملتش حاجة في الدنيا الناس تفتكرني بيها اهلي هيعملو اية هيزعلو عليا ولا وكلام كبير اوي دار في بالي مقدرش اوصفة

كان احساسي غريب مكنتش بعيط ولا زعلانة ولا رد فعلي كان طبيعي ممكن حد في موقفي يعملة كنت ساكتة مش عارفة اتكلم مع حد ولا افكر كنت برتجف لما احط ايدي علي الورم وابعد ايدي بسرعة زي ماتكون حاجة وحشة بعيدة عن جسمي وخايفة منها مع انها جوايا

المهم عدي اسبوع كانة سنة وروحت وقابلتة تاني ونتيجة التحليل كانت انة التهاب في الحنجرة ودي كانت اول مرة اسمع الموضوع دة ومش فاهمة حاجة المهم انة قالي انها حاجة بسيطة وهتروح واداني قائمة من الممنوعات والمحظرات والادوية

وبعد ماعرفت قلت الحمد لله وابتديت اعيط برضة مفيش فايدة العياط دة هواية معرفش لية عيطت دلوقتي ومعيطش في الاول يمكن كنت مصدومة حاجة غريبة

ولسة الالم موجود وساعات بيزيد وبتخنق

بس متخافوش عمر الشقي بقي و الحمد لله علي كل حاجة