اولا كل سنة وانتم طيبين بمناسبة عيد الاضحي المبارك اعادة الله علي الامة الاسلامية بالخير يارب

ثانيا انا قررت احط صورة لصلام عيد الاضحي بدل من صورة الخروف لاني نفسي كل الناس تقدر وتعرف قيمة صلاة عيد الاضحي في جماعة ويارب كل المسلمين يحرصوا عليها انا عرفة ان الدنيا سقعة وهي الصبح بدري بس هنحاول

ثالثا باة ودة مهم عند ناس كتير اوي ان الموسم دة موسم افلام للعيد جامد جداا وواضح اوي ان كل الافلام الي نازلة بعيدة تماما عن السطحية والتفاهه الي اتخنقنا منها الموسم الي فات يظهر انهم حسو بغلطتهم والنقاد طلعو عين الممثلين والمنتجين ولا يخفي علي احد ان التنافس اصبح شرس جداا لان كل الفنانين ابطال كبار فعلا مثل( احمد السقا ,خالد النبوي ,كريم عبد العزيز ,خالد صالح , مصطفي شعبان , وغيرهم وابطال فيلم الماجيك صغار السن الموهوبين فعلا )

ولكن لحظة واحدة استوقفتنا جميعا اغلب هذة الافلام دار في فلك واحد البوليس وظباط البوليس والقانون والخروج علية يعني عسكر وحرامية والكل يعلم جيدا ان السينما مراة للواقع يعني فعلا الشعب باة عدو للبوليس وظباط البوليس والعكس كانوا قديما يقولون الشرطة في خدمة الشعب والان الشرطة في خدمة مين والشعب مين يحمية من اولادةعلي اعتبار ان الظباط الشباب دول من اولاده ودة اكثر شيء محزن للوضع في مصر اكتر من اي ماساة ممكن نتكلم عليها

بس عشان بلاش نكد واحنا داخلين علي عيد مش هنتكلم الا علي جودة الافلام والنيو لوك الي عملاه السينما الموسم دة ويارب دايما

وبعيد عن السينما نرجع للعيد ونصيحة للكبار الي عايز يحس بالعيد بجد يقرب من الاطفال ويلعب معاهم هيلاقي اتسربت جوة نفسة فرحة للعيد محسهاش الا وهوة صغير وافتقدها كل ما يمر بية سنة ويكبر يروح يزور اهلة ويكلم اخواتة المسافرين وهو يحس معني للعيد ودعوة جريئة جداا للصواريخ ومتسمعوش كلام انها ممنوعة والكلام دة زي ماهو مفيش عيد من غير خروف برضة مفيش عيد من غير صواريخ امال هنحدف الناس الي ماشية في الشارع مين هيحدف عليها صواريخ ويستخبي

تحياتي للعيد والخروف الي هيدبح وربنا معاك معلش حقك عليا